نحنا جيل بناه معمر!

مش عارف علاش لازم نطلعو دستور جديد وعلاش مارجعناش لدستور قبل 69؟؟ شن العبرة من الفوضى؟ وصرف المليارات؟

السبب هو غوغائية المستفيدين بإسم الثورة وكذلك ماننسوش جهل الشعب باللي قاعد ايصير لأن لو الشعب واعي ومثقف في أغلبه ماكانش حكمنا معمر 42 سنة من الأساس لكن معمر سهل الغش والواسطة ودعمها وماحطلهاش قوانين لمكافحتها، وزاد أصل فينا القبلية والجهوية وسقاها ورعاها، وأصلاً حني من الأول فينا هلبا جهل، لأن كان هذا راهو في ال69 ماكانش حد طلع يقول أبليس ولا أدريس!!

تونس فيها 10 ملايين نسمة وميزانيتها 28 مليار دينار تونسي يعني في حدود ال 25 مليار دينار ليبي، وحني ال6 مليون والميزانية لسنة 2014 هي 56 مليار دينار ليبي و عجز الميزانية 16 مليار دينار مفروض يغطيها مصرف ليبيا المركزي بسندات اقتراض!

علاش المقارنة بتونس؟
حني بلد نفطي وهما لا. حني شوية وهما قريب مرتين زينا.

حني شعب أغلبنا شباب لكنهم إختارو طريق العنف والدمار بدل الحوار والعقل.

وينه الشعب الليبي الطيب يا معمر؟

وينه الشعب الليبي الطيب يا معمر؟

قصدي زي الزومبي الشباب ماشيين ومايندروش على روحهم أن لسان حالهم يعيط ويقول ((نحنا جيل بناه معمر واللي يعادينا يدمّر))!!

تي أركح إنت وياه تربح راهو البلاد تخربت وفلست ومعاش حد يبي يجي يستثمر عندنا ولاعندنا علم ولا قدرة نعمروها البلاد بروحنا راهو فينا هلبا ماشيين بنظام ((رزق حكومة ربي إيدومه)) وملايين ماشيين بنظام ((أخطى راصي وقص)) وفينا هلبا حالياً مقعمزين خايفين يستنو في لحظة الإختطاف والقتل بسبب الكلام على النت!!

فيقوا يا ليبيين وأبدا من نفسك غيرها، معاش تخنب، معاش تطلع في الأحمر معاش تفتن وتاخد جيهة ولاد عمك وضناك واوقف مع اللي في صالح البلاد والعباد حتى ولو ضد منطقك وتفكيرك، تبي بلاد آمنة ومستقرة أخدم علي مسبباتها ماتخشش مستنقع الكراهية والقتل وآتون الحرب لأن لما ايسيح الدم خلاص معاش يرضى الثاني إلا بالدم في المقابل والشجاع واللي يحب الخير بس هو اللي حيتنازل على الدم مقابل أمن البلاد والعباد، وهادم للأسف عملة نادرة في ليبيا (هذا كانهم موجودين أصلاً وما أنقرضوش).

6 تعليقات على “نحنا جيل بناه معمر!

  1. ألحمد لله شعرت أن الكلام الذي يدور بداخلي ونتكلم بيه للمقربين لي فيه ناس حاسين بيه وحاسين بأزمة ليبيا الحقيقية وأزمة الأخلاق اللي ضاعت يسلم فمك علي كل كلمة قلتها في مدوناتك لكن مازال عندي أمل لأن في ليبيا فيه ناس تفكر صح .. هم مش هلبة لكن موجودين ونتمنى يكون ليهم دور في المستقبل

(حرية النقد والرد متاحة للجميع شرط أن يكون تعليقك ضمن الموضوع وخالي من الكلمات البذيئة)

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Get a Gravatar
(mad) :-[ (B) (^) (P) (@) (O) (D) :-S ;-( (C) (&) :-$ (E) (~) (K) (I) (L) (mrgreen) (8) :-O (T) (G) (F) :-( (H) :-) (*) :-D (N) (Y) :-P (t0) (t1) (U) (W) ;-) (wp)