دوامة مصرف!

تنوض السبعة باش تكون في طابور المصرف اللي في الشارع التمانية والذبان يزن عليك، مع أحاديث قصف مطار معيتيقة والتحليلات العسكرية الفذة، ويجيك نوري يقولك معليشي أوقف عالحيط باش ما إتضايقش السيارات، وتوقف وتسمع كلام نوري، كله باش تلحق تخش “زوز زوز” وتجري الداخل تسجل إسمك في القائمة اللي تتسكر التسعة ونص وتقعد واقف في الممرات اللي مافيهاش ولا كرسي وكله يهون باش تخش تقعمز الساعة الحداش ونص بعد مايطق فيك الدور وتقعد متع ساعة وشوية بين زوز موظفات وحدة تشد في راسها وتقول لمحمد يفتح الباب لأن المكتب “غط” والتانية تسب في المنظومة وتقولي إن شاء الله نقدر نكملك معاملتك.

تكمللي نص المعاملة الطناش ونص وشوية وكله مشي بالعفار والتنطفير وإنت تساير وشاد على سنونك، وتلفون من مدير فرع تاجورا يبي يفتح مشروع تكوليص لواحد صاحبه وتقوله لا مافيهاش كيف، ويخش واحد يعشش يقول كيف القائمة سكرت ونبي ندير معاملتي ويقوله محمد تعالا غضوة الصبح بكري وشد طابور زيك زي الناس هادي، وراهو كله بفلوسك مش جاي تشحت، والشبوب محمد بالمسدس والكنتيرا الزرقا اللي مطلعها المسدس ومعريله شوية من ظهره، يلود قدامك ويشبحلك ومرة مرة يقولك كملت ولا مازال؟ باش يدخل اللي بعدك.

معاملة كاملة ماتقدرش إديرها لأن المنظومة مش معروف خيرها وماتبيش تاخد مني الاوراق لأنها تخاف ايريحو منها لما بيرجعو يحولو للدور الخامس، باهي خوديهم، لا ماناخدهمش غنت وليلها يوم تاني، باهي امتا نوليلك؟ الأحد باهي؟ لا مش عارفة! باهي ممكن رقم تلفون نتصل بيه باش مانضربش مشوار؟ لا ماعندناش تلفون ياريت عندنا تلفون نعطيهولك.

أني هنايا كظمت غيظي وسكتت لأن مافيش رد منطقي ومؤدب قدر عقلي يطلع بيه.

المشكلة في من يوقف 4 ساعات وبعدين يوصل فيه الدور يقولوله لا اليوم معاش نطلعو في بطاقات!

20141125_113819

بعدها تطلع كلك خيبة امل لأنك مادرتش اللي جاي تبي إديره وشكله لازم من طابور تاني يوم، ومع هذا تتفائل وتقعد تلود من الدور الأرضي للسادس إدور على “حمدي” البشمهندس اللي عنده الإجابة للنص التاني من معاملتك، والاسانسير ياواقف يا معبي، وتضطر تركب الدروج لأن موعد تسكير المصرف خلاص مازال عليه ممكن نص ساعة، وماتلقى حد عنده رقمه ولا تقدر تحصل حد يعطيك معلومة.

لما طلعت مافيش قهوة فاتحة والبتارية متع الجسم خلاص، وبفلوسك جاي لكن يتشرطو عليك بس لأنك ليبي وعايش في ليبيا لأنك لو كنت في بلاد تانية ممكن يعاملوك كإنسان ليه قدر وإحترام.

ولنا لقاء آخر غضوة وإشبح نلقى حمدي ولا مانلقاشي في دوامة أخرى جديدة.

 (I) تحديث يوم 1 ديسمبر 2014:
معليشي يا سيد راهو معاش تقدر تشحن البطاقة (فيزا نت) لو ماعندكش حساب جاري معانا! نعم؟ كيف صار!؟ إيه والله هذا هو من يوم الأحد خلاص طلع قرار في المصرف لازم تفتح حساب جاري وبعدين تحول الفلوس عن طريق المنظومة سواء من الإنترنت (https://amannet.aman-services.com/Net/) أو من التطبيق الخاص (https://play.google.com/store/apps/details?id=com.dotit.amanbank) على الأندرويد!

الزمان: اليوم 25 نوفمبر 2014
المكان: مصرف الآمان الفرع الرئيس، طرابلس.

3 تعليقات على “دوامة مصرف!

  1. معليشى خوي علي

    الحقيقة انت خشيت في دوامة ودرتلي دوامة معك

    والله الحقيقة مافهمت حاجة من الي اتقول اتشد طابور الساعة السبعة علي المصرف باهي شن دخل نوري يقولك معليشي أوقف عالحيط باش ما إتضايقش السيارات وبعدين القيتك علي طول بطاقة ومش عارف شنى
    الحق ماحصلتش من موضوعك راس خيط ياريت عرفتنا انك بتسحب فلوس او انك بدير بطاقة سحب
    لان الحكاية فيها يطاقات ومصرف
    لالالا حالتك مستعصية جداً جداً ماتمشى معك في ليبيا

  2. مشيت للمصرف أول يوم لقيت طابور طويل عريض، فورا وخرت و رجعت للسيارة و كملت مشاويري، مكنتش عارفة شن صاير، رجعت ثاني يوم لقيت طابور و انا معاش فيها لازم نشحن البطاقة وقفت في الطابور زي الناس قالولي النساوين يخشوا طول!! لوهلة فرحت و بمجرد ما وصلت للباب صارتلي صدمة وخشيت للمكان سؤال واحد في بالي، فيه واحد بس من اللي يجوا يلحق يحصل حاجته؟

    ركبت للدور الثاني من الدرج لان المصعد زحمة لقيت زحمة في الدور معرفتش ليش ،، مشيت للمصعد على امل نركب للخامس فتقابلني الموظفة متع المكتب متع البطاقات نسألها المكتب متعكم وين توة، متردش عليا و دارت روحها مسمعتنيش و رجعت بسرعة للمكتب تقول بناكلوها!!

    خشيت المصعد و ركبت للدور الخامس و نكتشف أن مكتبهم غيروهم للمرة المليون!!!

    نزلت ووقفت جنب اللي كانوا يستنوا طلعت جهازي و قعدت نبربش فيه، بعدين لقيت الباب مسكر استغربت، مشيت سألت ليش؟ وهل يدخلوا؟ قالي بالارقام ،، دقيت الباب طلعلي العسكري ،، قلتله نقدر نسجل رقم؟ بحكم أنه قبل عادي نجي نسجل و نستني فقالي بنبرة تعرفوها كلكم ،، لا تعالي الساعة تسعة!!

    فورا وخرت وروحت ،، وفهمت أني مستحيل نلحق على حاجة في البلاد هذي ،، و في بالي حاجة واحدة بس ،، اللهم سرع في هجرتي من هذا البلد قبلما نرتكب جريمة قي روحي!!!

    • وللعلم باش مايمشيش منك يوم تاني عالفاضي، حالياً معاش تقدري تشحني البطاقة لو ماكانش عندك حساب جاري معاهم، باش تحولي فلوسك من الجاري للبطاقة عن طريق المنظومة في النت أو عن طريق التطبيق متعهم عالتلفون!

(حرية النقد والرد متاحة للجميع شرط أن يكون تعليقك ضمن الموضوع وخالي من الكلمات البذيئة)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Get a Gravatar
(mad) :-[ (B) (^) (P) (@) (O) (D) :-S ;-( (C) (&) :-$ (E) (~) (K) (I) (L) (mrgreen) (8) :-O (T) (G) (F) :-( (H) :-) (*) :-D (N) (Y) :-P (t0) (t1) (U) (W) ;-) (wp)