قبر الاسمري

الناس مكبدة على قبر الاسمري اكثر من الاشخاص اللي ماتو في المشكلة !!
والحقيقة الجهلة يطيحوا ببعضهم ديما … الجاهل اللي مداير روحه ( سلفي ) وقصف القبر بالار بي جي … والجهلة اللي على اساس ( صوفيين ) اللي مدايرين درع بشري على صنم الاسمري !!
يعني لو الجاهل الاول ضرب فيك ار بي جي ثاني حتموت شهيد في سبيل هبل ؟؟ ولا كيف ؟
والله نشبح فيه لو ابو جهل عايش كان شافلكم الزوز باحتقار وقال : قبحتكم الآلهة !!
وعلى فكرة من اسبوعين بس ( روفر ) حطت في المريخ !!

انا ضد الهمج اللي مدايرين رواحهم موحدين وما بعدهمش ويهدوا على القبور بهذه الطريقة الهمجية
بس في نفس الوقت انا ضد الهمج اللي يعبدو في القبور ويضحكو عالناس ويستغلو فيهم

وللحق وللتاريخ نبي نحكي للي ما يعرفش ماهو صرح ( سيدي عبد السلام الاسمري )

قبل اكثر من 11 سنة تقريبا يعني لما كان عمري 13 سنة تقريبا … تم طردي من حلقات تحفيظ القران الواحدة تلو الاخرى في نالوت بسبب التمرد على بعض الافكار المذهبية السائدة هناك
!! بس الجماعة حرية للمليون ما نحكيلكش

استنيت لنهاية المدرسة وبدا العطلة الصيفية وبعدين مشيت
وين مشيت … مشيت لزليطن عن طريق طرابلس وفي التاكسي التقيت باثنين طرابلسية ماشيين لذات الغرض والحمد لله كنت متردد بروحي لان صعب في هذاكا العمر وكنت قلت للوالد اني ماشي لمدينة اخرى مع مجموعة من نالوت بس كانت عندي رغبة في استكشاف المكان وممكن الاستقرار فيه فترة مابعد المدرسة في كل عام
وصلنا زليطن والوضع مريح الناس في غالبيتهم طيبين والجو هاديء والمدينة جميلة
مشينا للأسمري باش نتفقدوا المكان واذا عجبنا نقروا فيه
وكانت هذي المرة الثانية اللي نزور فيها المسجد الاسمري بس الأولى كانت خاطفة
هذا الصرح العظيم في بنائه وامكانياته وتاريخه …. هو في الحقيقة رمز الجهل والتخلف والدجل في ليبيا بل لا يضاهيه في المنطقة سوى قبر الست زينب في مصر !!
مكان لا يمكن تخيل مافيه لمن لم يزره … اولا باب القبر رخامي ومرصع ومزخرف فيما باب المسجد الاخر عادي جدا
القبر يقع داخل مبنى المسجد مبني بالرخام الفاخر ومزخرف ومنقوش نقش يسحر العيون
النساء والرجال من شتى انحاء ليبيا ومن المغرب وتونس والجزائر وغيرها يأتون قبل اداء الحج لوضع قرابينهم للقبر
ذهب … وعملة ورقية … لا اظن ان هناك مكان في ليبيا يستقبل هدايا كما يستقبلها قبر الاسمري
تخش للقبر عياط ونياح ودعاء وتضرع هذي تبي تتزوج وهذا ماعنداش ولاد يبي ولد وهذا ولد مريض يبو يعالجوه كلهم ماشيين للصنم هذا باش يعالجهم ويقضيلهم حاجاتهم
والله العظيم شفت بعيون نساوين في قمة الخشوع عند القبر والتضرع يا سيدي يا مش عارف شني !!
في الداخل حفلات رقص راقية جدا .. عفواحلقات ذكر .. بندير وواحد يدور وسط الحلقة زي الاهبل وراسه يتدلدل تقول سكران والبخور والدخان تقول خاش ديسكو
وسط هذا كله هدرزت مع قيم المسجد قتله البدخ هذا كله من وين ونحنا نعرفوا ان الاوقاف عمرها ما بنت جامع حتى شيمنت عادي
قالي كله من القبر لا وبكل فخر يقولي بركة سيدك عبد السلام
للأسف والحق والحق أقول مع كامل احترامنا لمرتادي هذا الجامع بس هذا ممكن احرف من مسجد الضرار
لانه مسجد مبني بالضحك على الناس وسرقة اموالهم بالباطل والدجل والخرافات
اعتقدت انهم ناس يحترموا القبور .. بس الحكاية مش هكي .. القيم عالجامع يحكي ويقولي ابن سيدي عبد السلام مدفون هني … ويييييين في وسط السااااحة ساحة ماشيين جايين الناس عليها وهو يعرف انه مدفون غادي طبعا مش عارف هالمعلومة صح او لا
لم يكلفني الوضع سوى يومين حتى غادرت المدينة دون حتى استشارة الاخرين واشكر طبعا القائمين على زاوية الاسمري للضيافة الجميلة في اليومين … طبعا البذخ من اموال القبر !!!
ذهبت بعدها الى مسلاتة وكان فيه مجموعة هلبا غادي يقرو وقريت على يد الشيخ المعروف هناك الشيخ ابراهيم الزنيقري وهو من طبقة الشيخ مصطفى قشقش والطرابلسية يعرفوا قشقش جيدا
وكذلك الشيخ ابراهيم كشيدان احد اعضاء مسابقة دبي الدولية حاليا

نبي نقول هالكلام بس لأن هلبا ناس ما تعرفش حقيقة ما يجري في الضريح الذي يبيض ذهبا
في الاسمري كان السجاد والفراشات زي الرز … اما في جامع المجابرة بمسلاتة فكنا نجلس على حصير يعود للقرن التاسع !! فيما اظن .. هذاكا اللي بالقش رسمي وقاسي جدا تقعد عليه 4 ساعات او 5 ساعات متواصلة ولا يتم تغييره لا صيفا ولا شتاء
في الاسمري حتى الكوجينة الضخمة مكيفة … في المجابرة وقتها المسجد كله مافيش مكيف واحد والجو صيف وشد روحك يا مواطن
في الاسمري يعطوك 20 دينار كل شهر بالاضافة الى ماكلتك وشرابك .. شي رائع لتشجيع الطلبة بس من يصرف على الاف الاطفال والشباب اللي يقرو غادي .. إنه القبر
في منارات مسلاتة انتا تدفع 15 او عشرين دينار باش تاكل او اجر بروحك وكول بروحك زي ما درنا حني
هذا هو المكان اللي البعض مكبد عليه اكثر من الارواح اللي ازهقت قريبا منه
وياريت الجاهل اللي ضرب القبر بالار بي جي يطلع ويقول انا اللي ضربت كانا هو بيطلع فيها مناضل مش جاي في الليل زي الطحالب

وان شاء الله ربي يهدي عباده وتتوقف هالعراكات الجاهلية

(حرية النقد والرد متاحة للجميع شرط أن يكون تعليقك ضمن الموضوع وخالي من الكلمات البذيئة)

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Get a Gravatar
(mad) :-[ (B) (^) (P) (@) (O) (D) :-S ;-( (C) (&) :-$ (E) (~) (K) (I) (L) (mrgreen) (8) :-O (T) (G) (F) :-( (H) :-) (*) :-D (N) (Y) :-P (t0) (t1) (U) (W) ;-) (wp)