نافورة الغزالة، بصراحة مكبرين موضوعها أكبر مما يجب، لو الليبيين قررو إنه يجب إزالتها تُزال، ولو الليبيين قررو إنها تقعد فتقعد، مافيش مجال للقرارات الفردية وحكم الفرد والأقلية، خلاص هالزمن إنتهى وولى، وأصحابه تشترعو في الدنيا والآخرة، وأي حد بيعتنق أسلوب حكم الفرد، يتوقع إنه حيتم “نخصه” بالحديدة في أماكن لايمكن أن يتخيلها، ووقتها حتى (خيركم شن فيه) مش حتنفعه! يعني خودو العبرة من نهاية القذافي.

نافورة الغزالة

اللجنة الأمنية العليا تستلم في البلاغات وعاطيتكم أرقام هواتف، اللي يشوف حاجة غلط يكلمهم، ولو ماحد رد عليه يحاول يتكلم في قنوات الراديو، ولو ماحد رد عليه، أطلع إعتصم إنت ومن يناصر في قضيتك، مانبيش نقولك برا حل الموضوع بروحك وبإيدك لأن هكي بيولي غوغائية لما يتحول المجتمع لأساليب زي هادي، زمن الحرب بالسلاح إنتهى واللي شاديين السلاح توا لازم يرجعو لحياشهم عدا الجهات اللي تتبع للحكومة.

كلام عبدالله ناكر على الفيسبوك مكبرينه ودرتوه تكلم علينا كلنا! قصدي غير علاش مكبرين بيه!؟ أني ماحسيتاش يتكلم عليا ولا على غيري، الراجل معروف إنه مش عالم مفكر ولايفهم في الإنشطار النووي! باهي علاش توا سمعتو رأيه وبديرو منه قصة؟ الراجل خلوه في حاله يهدرز ولا خلاص كساد؟ وكلامي موجه لمن ساهمو في نشر فيديواته وردو عليه وكأنه كان يقصدهم!

أعتقد أن أفضل شي لأي شخص يديره توا إنه يلزم خدمته ويتقي الله فيها، أو يدير حاجة فيها منفعة ليه ولغيره، مايطلعش في الأحمر ويحترم قوانين البلاد، ومايوسخش الشارع حتى صوتياً، يحترم غيره ويقدر الشهداء اللي ضحو بحياتهم باش إنت وهو وهية تقدرو تهيجو في الفيسبوك، وتقضو عشيتكم في كاراكالا.

ولو عارف روحك ماعندك ما إدير فايدة للمجتمع، حاول إنك تنمي قدراتك وتشد الإنترنت وتفتح موسوعة ويكيبيديا مثلاً وتقرالك حاجة جديدة، أو تفتح يوتيوب وتتفرج على حلول مشاكل الكمبيوتر مثلاً، أو تفتح مواقع متع How To وتقرالك وتتعلم لأن العلم نور والجهل ظلام. لكن كانا ما فلحتش ومالقيتش إلا طريق الفساد، فمرات حتى نوم الظالم عبادة.. خش أرقد وإكفي الناس شرك!

يا دم الشهداء… لن تضيع هباء.