ديموكراسينا.. ديموكراسيهم

ديموقراطيتنا : الطفل يذهب إلى المدرسة متأخرا بنصف ساعة !! وعندما تسأله المدرسة يقول راقد !كنت نحساب فيه عطلة !؟طبعا من كثرة العطل ( 2 – 28 مارس – 7 براميل 1 -9 -9 – 9 ووووو الخ !!
ديموقراطيتهم : الطفل أصلا ما يجيش للمدرسة هما يمشو يجيبوه من الحوش والباص يوقفله في فم الباب !!!

ديموقراطيتنا : تشد طابور في فم الكوشة ساعتين باش تاخد خبزة !! ولما يوصل دورك تكتشف انك اصلا واقف في الطابور متع الجمعية اما الكوشة فهو الطابور اللي بجنبه بالضبط. .. بعد طابور البنزينة عاليمين !!
ديموقراطيتهم : دول عدد سكانها 90 مليون زي المانيا ولا دول سكانها ما ينعدوش اصلا زي الصين وماعندهمش لا طوابير ولا زحمة بكل ؟؟!

على ذكر الأعداد الجماعة لبرا عرفوا حتى المولود رقم كذا ويعرفو معدل المواليد اليومي ومعدل الوفيات اليومي !!
وحني مافيش ليبي يقدر يعرف بالضبط هل حني 5 مليون ولا 6 مليون ولا قداش بالضبط !! قصدي كل واحد يطلعلنا بإحصائية

ديموكراسيهم : لما صارت مظاهرات في وول ستريت قلب اميركا ! مافيش مسؤول طلع قال مؤامرات روسية ولا اسلامية لزعزة استقرار الدولة الكبرى !!
وحني لما صاروا مظاهرات في كل مكان في ليبيا .. طلع واحد يقولك مؤامرة امريكية وفي نفس الوقت مؤامرة من القاعدة وايضا في الوقت نفسه قال مافيش مظاهرات في ليبيا اصلا ..؟

ديموكراسيهم : لما تفتح التلفزيون ويجي خبر على امريكا تسمع كلمة ( الإدارة الاميركية ) مش حتى الرئاسة والحكومة !! هكي ثقافتهم الادارة
اما لما تجي تفتح ديموكراسينا تسمع ( الزعيم الليبي ) و ( نجل الزعيم الليبي ) وحتى عجل الزعيم وناقة الزعيم وخيمة الزعيم تسمعهم

وهذي منقولة من أحد الإخوة : قالك تفتح الجواز الكندي تلقى فيه مكتوب ( نحرك أسطولنا من اجلك )
وتفتح الجواز العربي تلقى فيه ( عند فقدان الجواز تدفع غرامه ماليه ) !!

ديمو كراسيهم : لما ينتخبو رئيس او اي مسؤول يسمعوا لبرنامجه ويعرفو مؤهلاته وتاريخه المهني
اما عندنا فلما نقيموا او نختاروا اي مسؤول فالسؤال الأول والوحيد هو من أي منطقة هذا الانسان ؟ ولما تشوف زحمة قدام مقر الوزارة فسبب المظاهرة انهم يبو وزير او مسؤول من منطقتهم !!

ديموكراسيهم : نادرا ما تشوفهم مقعمزين على كراسيهم !! يعني يطلع اوباما يدير مؤتمر صحفي وهو واقف خطاب وهو واقف احتفال الفوز بالانتخابات وهو واقف !
اما ديمو كراسينا فأهم حاجة عندنا كراسينا واما المخلوق اللي كان حاكما فكرسيه لازم ينحط فووووق ويشوف للحاضرين من مكان عالي

ديموكراسيهم : امريكا بريطانيا روسيا وكل الدول الغربية تقريبا عندهم متحدثين باسم حكوماتهم بكل اللغات حتى العربية وتلقاه يتكلم فيها فصحى مية المية
اما عندنا فمع ان اللغة الرسمية الاولى للدولة هي العربية فكان عندنا متحدثين يجيدون ضم المجرور والنصب على الفاعل وجر اللغة العربية الى حتفها
وحتى اللي كان على أساس وزير التعليم قال مرة ( حرف العاء ) مش ( العين ) !! ولا تحزني يا عين

ديموكراسيهم : يستقيل وزير الداخلية لأن قواته قتلت بالخطأ واحدا فقط من الشعب
ديمو كمراسينا : لكي تصبح وزير داخلية يجب ان تقتل على الأقل ثلث الشعب !

وبعد هذا كله طلع وقاللنا : حاسدينكم !! تي عارفينكم خايفين على كراسيكم

(حرية النقد والرد متاحة للجميع شرط أن يكون تعليقك ضمن الموضوع وخالي من الكلمات البذيئة)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Get a Gravatar
(mad) :-[ (B) (^) (P) (@) (O) (D) :-S ;-( (C) (&) :-$ (E) (~) (K) (I) (L) (mrgreen) (8) :-O (T) (G) (F) :-( (H) :-) (*) :-D (N) (Y) :-P (t0) (t1) (U) (W) ;-) (wp)