ماذا يعني العيش في الجماهيرية القدافية؟

يعني تفتح التلفزيون تتفرج على مباراة كرة قدم للمنتخب الليبي فجأة يقطع البث ويجيبولك نشرة الأخبار

انك تتفرج على رسوم ( كاتولي ) وفجاة تقطع الصورة ويجيبولك خطاب القذافي في مؤتمر الشعب العام

أنه في نشرة الأخبار يقولك القى الأخ القائد كلمة في المؤتمر جاء فيها : ( ويجيبولك الخطاب كله قريب ساعتين ) لغاية ما تنسى انك في نشرة أصلا

ان كل الأخبار هي نفسها بالضبط ( اجتمع امين اللجنة الشعبية لشعبية طرابلس باعضاء اللجنة الشعبية للشعبية في مقر الشعبية وناقشو الامور المتعلقة بالشعبية وكيفية تسيير اعضاء الشعبية للشعبية )

ان كل ليبي دار في حياته على الأقل 200 ملف في البحث عن وظيفة وتوزيع ثروة و تعيين وووو
لدرجة ان كل واحد ممكن يدير أرشيف لملفاته ويخدم فيه وهكي قضى القذافي على مشكلة البطالة

أن كل يوم تمشي فيه للمدرسة لازم تقول اقسم بالله ان الكتاب الأخضر منهجي ودليلي !! يعني تبي ولا ما تبيش

ان الساعدي القذافي يسجل هدف من تسلل واضح جدا والحكم ما يقدرش يرفع الراية !!؟

أنه لما طلع حكم شجاع ورفع مرة الراية على تسلل للساعدي المعلق قال ( تسلل جميل ) !

انه المنتخب لما يخسر ننتقدو اللاعبين ولما يفوز لازم المقدم يقول هذا بفضل ثورة الرياضة والفاتح وراعي الرياضة الليبية ومهندس الكرة الليبية وسواق الكرة الليبية وبرا كل واحد من ولاده عنده لقب

انك تمشي تدير جواز سفر جديد يقولولك ( الجلدة متع الجواز مافيش ) ترجعلهم بعد شهر يقولك نفس الإجابة الجلدة مافيش
تقول جلد تمساح نادر مش كاغط وخلاص

انك تقدم تدير بطاقة شخصية انت وصاحبك في نفس اليوم صاحبك ياخدها ثاني يوم لان بوه واصل وانتا تقعد 60 شهر باش يطلعوهالك ولما يطلعوهالك تبدا طول في اجراءات تجديدها

انك تبدا قاعد في ميناء بحري ويوقف عليك متع الشرطة الزراعية يقولك شن تدير هني وكان رديت عليه يحولك عالحرس البلدي وبرا افهم اما جيهة حتعاقبك ولمني بتشكي

انك مستحيل تمشي للدكان ولا لكوشة من غير ما تلقى في الطريق لافتة عليها صورة القذافي كل 30 متر

ان اللافتة متع صورة القذافي حجمها 40 في 60 متر واللافتة اللي تقول في مطب بعد شوية مساحتها 2 سنتيمتر ومصدية ما تشوفش فيها شي

انك تقعد 20 سنة تقرا في الكتب ان العرب امة واحدة ومصير واحد وصراع وجود والقذافي يعاودلك نفس الكلام وفجأة بين ليلة وضحاها القذافي يقولك العرب مافيهم فايدة غير الشفرة انتا وياه وبندر للافارقة والوحدة الافريقية

ان في المدرسة الثانوية طلبة السنة الاولى ثانوي يقروا في نظام الفصل ( السمستر ) والمقرر انهم يقرو 3 سنوات
في نفس المدرسة طلبة السنة الثانية يقرو بنظام الفصل ( السمستر ) بس المقرر انهم يكملو 4 سنوات
وفي نفس المدرسة سبحان الله طلاب السنة الثالثة يقرو بنظام السنة مش الفصل !!
وطبعا هذا بسبب الوحي اللي ينزل فجاة عالمسؤولين فيغيرو النظام كل نصف سنة

انه تطلع نتيجة الشهادة الثانوية الدور الاول ( لم ينجح أحد )
تجي الدور الثاني تشوف النتيجة تلقاها ( لم يرسب أحد )
وسبحان مغير الأحوال

(حرية النقد والرد متاحة للجميع شرط أن يكون تعليقك ضمن الموضوع وخالي من الكلمات البذيئة)

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Get a Gravatar
(mad) :-[ (B) (^) (P) (@) (O) (D) :-S ;-( (C) (&) :-$ (E) (~) (K) (I) (L) (mrgreen) (8) :-O (T) (G) (F) :-( (H) :-) (*) :-D (N) (Y) :-P (t0) (t1) (U) (W) ;-) (wp)